China di virtù e di difetti
la po’ pigghiari pi lu versu giustu,
si la vasata e li tò sacchetti
sunnu comu un ritrattu a mezzu bustu.
Sapi chi l’omu n’avi di bisognu
pi amuri, pi lu pacchiu e sirvimentu
ti strica li spaddri si ti fa lu bagnu
e la notti, di la so vucca, duci lamentu.
Po’ esseri vecchia, mizzana o picciutteddra
Ma c’è pocu da fari quannu è beddra.
Curiusa ma ti runa lu so amuri,
e spissu l’omu lassa la vasteddra.
Ti porta n’ta stu munnu cu duluri
e la sò minna, ti la metti m’ucca
pì quantu t’è concessu di campari.
La fimmina è chissa n’un si iapi vucca.
Amu chi brilla s’un ci metti l’isca,
chi s’iddra voli ti sputa e po’ t’ammucca:
ammatula curriri chi ti veni a pisca.
Ma pi l’amuri, pì la sò devozioni,
pì tornacontu o chiddru chi s’ammisca,
la trovi sula cu li tribolazioni.
E niatri masculi cu la canna n’manu
vulissimu piscari nà balena
quannu chi semu pisci di tianu.
Onesta o buttana: nuddru lu po’ diri.
Mancu lu preti trantu comu un sceccu
chi cu la tonaca stessa si la disìa ficcari.
E nuddru po’ diri o si po’ diri beccu,
chì, comu di niatri, si voli arrassari
pari a li nutrica chiancemu di duluri.